لدواعٍ أمنية..!

البتاع ده جالي على بريدي الإلكتروني..
أعتقد انه ح يعجبكم..

جفت الأقلام ورفعت الأحذية..!

سألبس حذاء عمي..!
تلك الجملة البسيطة التي اطلقها ذلك الطفل الصغير.. رأيته في الجزيرة هذا الصباح بعد يوم حافل ظلت البشرية بأكملها تقريبا فيه تتداول أبجدية الحذاء..!
المشهد كالآتي..
“ستاتيوهات” متعاقبة في الفيس بوك تتحدث عن حذاء ما ورئيس ما وبعدها بقليل ذكرت “منتظر” ما..! لم أعرف بالطبع ما يحدث لانهماكي بالبحث عن شيء أكتبه بمعزل عن أية فضائيات أو شرائط أخبار..
بعدها بقليل رأيت الفيديو-المقدمة الهادئة- الحذاء-الانحناءة الرائعة (بالنسبة لسنه رائعة حقا)- ارتطام الحذاء بالعلم ثم بالأرض وصوته الذي ينم عن وزن ثقيل 2 أو 3 كيلو مثلا-الصيحة-الفردة الأخرى-صوت”العجن” الذي يشعرك ان الرجل يفترس حيا في خلفية المشهد…

..كل سنة وانتم !

يا برتقان أحمر وجديد..
..بكرة الوقفة
وبعده الوقفة..
وبعده الوقفة..
لسه باقي لنا كتير ع العيد..!!

سالم الشهباني

انتحال شخصية..!

انتحال شخصية

كان من المفروض أن تكون مكان هذه التدوينة تدوينة أخرى -كتبت معظمها فعلا وموجود في الDraft- تنتمي إلى منهج الفيصلوجية البحتة.. لكن لظرف طارئ وجدت أنه من الأفضل الركون لمنهج الفيصلوجية التطبيقية أو الفيصلوجية التجارية بما ان تدوينة اليوم هي إعلان..!
شوهدت من فترة واحدة ست ترتدي فستان “ماكسي” مثلث الألوان تتابع ريّسهم حسني مبارك أينما ذهب ولا همت مصطفى أو هالة السمري في زمانهما..! ولسبب لا يعرفه أحد لم تنتحل شخصية واحدة منهما.. بل حرصت أن تكتب فوق رأسها بحروف هي دائما ناعمة مرنة انسيابية طرية كلمة “مصر”..!
وأسفرت تحريات مباحث أمن العقل المصري عن النتائج التالية:

فتح انطلاقة..!

- يعني إيه فيصلوجيا..؟
- مش عارف.. يعني إيه فيصلوجيا..؟
- مش عارف.. يعني إيه فيصلوجيا..؟
وتستمر البرويلة -بالمصطلح المسرحي- أو الكيو -بالمسرحي أيضا- بين ناس عايزين يعرفوا يعني إيه فيصلوجيا وآخرين لا يمتلكون إجابة حقيقية..
منهم أنا..!

نداء إلى قلب حبيبتي..

حبيبتي انا عارف اني
عديت كل الأصول
ده انا حتى باكون معاكي
زي الطفل الجهول..
وانا بابكي لأن ممكن
أطلب واحلم وانول..
فعشان كده بعد إذنك
لو تسمحي لي أقول:
.
.
.
.
.
.
.
.
.
.
إطفي الكاسيت يا بني آدمة
أنا باكره أصالة…

أحمد فيصل
1 سبتمبر 2006

ارحمي ودان أبونا بقه

تهييسوبيديا.. الكتاب الأول..!

تخفيفا لحالة الاكتئاب اللي عملتها على المدونة بدءً من قصيدة عشق جوايا اللي نكدت بيها على الشعب العربي مرورا بوفاة الدكتور المسيري ومسألة المنتدى وانتهاءً بالقصيدة الجديدة اللي نكدت بيها على شعب الكرامة – تِــمَّــًـا على رأي فادي اسكندر- قررت كسر هذه الحلقة المفرغة ببدء الكتابة في موسوعة الفحماية للأشكال الضالة في الحياة والنت “تهييسوبيديا”… لا تحاول البحث عن هذه الكلمة في أي من محركات البحث لأنك لن تجد إلا نتيجة واحدة ستعيدك إلى هنا…! ماركة مسجلة يعني )

شكل ضال 1

اثناء بحثي عن المواقع التي كتبت عن رواية “ربع جرام” لعصام يوسف، وجدته.. واحد بيبع 30 جرام من الزئبق الأحمر على أحد مواقع التجارة الإلكترونية..!!!

للبيع 30 جرام من الزئبق الاحمر النقي انشاء الله (هو كتبها كده)

تخيل..!!

لا والأنكت بقه تشكيلة الردود اللي عليه..

- انا ممكن اشيل منك الكميه كلها بس بشرط جزاأى او عينه من البضاعه بتعتك حتا لو ربع جرام من البضاعه نختبرها طلعت اصلى هنشترى واحنا اعدين وونروح نشيل بقيت الكميه…!

- الرجاء تزويدي بتفاصيل الزئبق الأحمر الذي لديكم ، نحن مستعدون لشراءه ، نريد المواصفات ومكان الصناعة والأسعار..

مكان الصناعة..!!!!! ماشي..

- انا مستعد بشراء الزئبق وبالسعر اللى تحدده وطبعا بعد اجاء كشف عليه للتاكد من انه زئبق حقيقى ومستعد للشراء الجااااااد والفورى..

وده طبعا غير “المزايدات” بقه…

- عندى الطلب متوفر اللى يبي يراسلني على الايميل وبعدين نتفاهم..

- لمن يريد زئبق احمر مشع يجي يفحصه ويتاكد بنفسه… متوفر لدينا …مراسلتي على الموقع..

- اناموجود معي زئبق روحاني ويختفي عندما احطه امام المرآة (!!!!!!!!!!!)

وما بين 13 تعليق تراوحت بين المزايدات والاستعداد للشراء فقط تعليق واحد وحيد اعترض على ما يحدث…

- هذا الكلام كذب × كذب ما في اصلا حاجة اسمها زئبق احمر سائل لكن فيه زئبق احمر بودرة مشعة وهذه البودرة لم تكن متوافرة ايام الفراعنة غير في معامل انتاج القنابل النووية في روسيا وغيرها واتحداك يا كذاب يا نصاب..!

وطبعا اذا كنت قد فهمت الجملة كما فهمتها انا ستستنتج ان الزئبق الأحمر لم يكن موجودا -على أيام الفراعنة- إلا في الدول التي تنتج القنابل النووية مثل روسيا وغيرها..!! مما يشعرك بتخلف الفراعنة الشديد حيث لم يكن لهم هم إلا بناء المعابد والأهرامات والمسلات في حين أن الدول من حولهم كانت تنتج القنابل النووية..!!!!!

وده العاقل اللي فيهم سعادتك…

شكل ضال 2

يوم الخميس اللي حضرت فيه مناقشة كان عندي طير بتاعة ورشة الزيتون

مش اروح بيتنا بقه بعد كده لأ رحت التكعيبة (عشان سهى كانت قايلة انها رايحة)..

ادور على أي حد من شلتنا ما لقيتش

كلمت محمد طلبة قال لي مش جاي

المهم قعدت

كان جنبي راجل وست فهمت من حوارهم انهم شعراء اغاني هابطة

وقاعدين يستنشدوا ف اغاني بعض وانا باناشدهم في سري انهم يسكتوا مش راضيين أبدا

والست كانت بتتكلم عن محمد منير وانها بقت بتكرهه ومش ح تتعامل معاه أبدا بعد ما رفض اغنيتها العظيمة “ملاكي أجرة ملاكي جيزة والفرقة صعبة والروح عزيزة” الأغنية اللي كان ح يكسر بيها الدنيا أكتر من يونس وطعم البيوت والكلام الفاضي ده.. لأنها اغنية “لكل الطبقات..!!”

الأنكت بقه كان الشاعر -الراجل- اللي من الواضح انه قابل اختنا الشاعرة بالصدفة وماكانش يعرفها قبل كده لأنهم تبادلوا أرقام الموبايلات وانا قاعد -نسيت اكتبها..!!- وكان شكله وطريقة كلامه مطابقان لشخصية “سيد” سواق الميكروباظ أخو “شوقية” في المسلسل الشهير الذي يحمل اسم تامر الى جوار اسمها…

وكان هذا الشاعر -ولنطلق عليه مؤقتا اسم سيد- كما قال متحصصا في كتابة الأغاني الشعبية وبالذات “الدراما” وكان بيفقع الأغنية من دول ثم يكتشف انها ح تبقى بايخة اذا القاها شعرا فيلحنها كيفما اتفق ويغنيها بصوته الذي لا يقل جمالا عن صوت سيد بتاع المسلسل

وبعد ما حكت الأخت حكاية ملاكي اجرة ملاكي جيزة للأخ سيد انبرى هذا قائلا انها حاجة نضيفة قوي بس عايزة بقه حضرتك ملحن ذكي وحرك عشان تطلع مزبوطة..! وعارفة بقة لو انتي شاطرة توديها عند وحيد المليجي…

-مين وحيد المليجي ده..؟

سكت وبص لها كده بصة بليغة جدا من نوعية “ما تعرفيش وحيد المليجي وعاملة لي فيها في السوق وبتكتبي أغاني..؟” ثم أعاد النصف الأول فقط -بالطبع- من الجملة مسموعا..

- لا ما اعرفش وحيد المليجي انا اعرف محمود المليجي بس

ههههههههههههه يا لهوي اسود ع الخفافة واللطافة….. (ده انا طبعا)

- لا بصى انتي تديها لوحيد المليجي وانتي مغمضة واول ما تديها له تقدري تحطيها عند اي شركة انتاج عشان شغله معروف عند كل شركات الانتاج وأول ما تقوليلهم بس وحيد المليجي ح يدوها للمطرب على طول..

وطبعا اعطاها رقم وحيد المليجي…!

المهم نخرج من الحدوتة دي بحاجتين مهمين جدا

اني ما اقعدش على التكعيبة لوحدي تاني

وانك لو شاعر وبتكتب اغاني خنيقة ولقيتني قاعد تجنبني لأني ح ارمي ودني..

شكل ضال 3

الحكاية دي ترجع لأيام ما كنت في مكتب عبد الرحمن يوسف

كنت بارجع بالليل جدا وخصوصا في شهر رمضان وكانت بتوصل معايا احيانا لـ2 أو 3 صباحا..

كنت لابس كاب لأن شعري كان طويل وشكله بيبقى وحش وهو طويل..

وعلى عادتي الزبالة التي لم أغيرها للآن كنت أجلس في المقعد الأمامي.. وقان بيني وبين السواق واحد تالت..

المهم لاحظت ان السواق بيحاول يجر معايا -انا بالذات- كلام بأي شكل..!

ولما نزل الرجل الثالث في نادي السكة وصار الكرسي اللي بيننا فاضي.. فوجئت بيه بيطلب مني اني اقعد عليه -على الكرسي الفاضي اللي في النص- واترك الكرسي المجاور للشباك..!!!!!

عشان البرد والسكة وتقريبا للمسافات بين البشر وعشان الكلام ما يتنتورش وكده..!

المهم اني التزمت بمكاني -انا مستريح كده- وغمرة جت بسرعة الحمد لله لأن الشوارع بتكون فاضية ف الوقت ده

وبعد ما نزلت افتكرت كلام صديقي علي ان أي واحد بيلبس كاب ويركب ميكروباص يعامل تلقائيا على انه شاذ جنسيا..!!!!

وإلى اللقاء مع المزيد من الأشكال الضالة..

اختباااااار الشهر…..

أجب فيما لا يزيد عن نص مليون سطر على كل سؤال من الأسئلة التالية..
١- أنا باغني وبرد (بجاوب) على نفسي.. صح..؟
٢- اذكر ٤٨ سببا خلوك تختار هذه المدونة بالذات لتدخلها
٣- اذكر ٦٩ سببا لعدم وضعك تعليقات سواء في البوستات أو حتى في الشات بعد دخولها..
٤- قل لي إجابة محددة وصريحة بنعم أم بلا: هل أكمل تدوين وللا ابطل..؟؟ فيما لا يقل عن ٢٧٠ ألف سطر ..
٥- الغي الإشراف على التعليقات وللا لأ..؟ فيما لا يقل عن ٢٧١ ألف سطر ..
٥- على كل طالب تدبير كشكول الإجابة بمعرفته…

البرج ف الدرج…!

القوس

الكوكب – المشتري ارقام الحظ –18-27- 36-45- 54 الاحجار- الفيروز ناري يتوافق مع : الحمل – الاسد-الجوزاء 22\11 – 21\12 لاعمال الملائمة: وكلاء سفر-مكتشفين-بروفيسورات- سفراء- تجار ايجابيات: متفائل، محب للحرية، مرح، له روح مرحة جميلة، صادق، مستقيم، ذكي وصاحب فلسفة. سلبيــات: متفائل بصورة عمياء، مهمل، غير مسؤول، سطحي، غير لبق، قلق.

انظر الشكل صفحة ١٧

أولا وعشان تبقوا عارفين أنا لا أعترف بالأبراج مطلقا.. لا هي ولا أية نظرية أخرى تحاول تصنيف الإنسان إلى فئات..! فكل إنسان في نظري ينتمي إلى فئة واحدة فقط لا ينتمي إليها شخص غيره…

يعني مثلا إذا نظرت للشكل صفحة ١٧ ( D= ) ستجد الراجل يتحدث عن برج القوس.. طيب.. أنا برج قوس..! مش مهم.. دعونا ننظر للمكتوب في حد ذاته بغض النظر عن علاقته بيا أنا…
سيبكوا من أرقام الحظ عشان مش ح تفيدنا ف حاجة
سيبكوا كمان من الأبراج اللي المفروض انها متوافقة معايا عشان مفيش ولا واحد منها توافق معايا قبل كده…!
في العمل مثلا:
المفروض ان برج القوس ممكن يشتغل وكيل سفر.. إزاي وهو غبر لبق ومهمل…؟!
وممكن يشتغل مكتشف يعني يا إما ح يعمل في فريق يا إما ح يقود فريق.. إزاي وهو مهمل وغير مسؤول وقلق..؟
وبروفسور.. ازاي وهو محب للحرية ومهمل وسطحي..؟
يا نهار اسود وسفير كمان..؟! ازاي وهو صادق ومحب للحرية وصاحب فلسفة وغييييير لبق (مستعد اضمن لكوا غير لبق دي برقبتي..!!)
أما تاجر دي بقه ممكن أثبتها لكوا بنفس الطريقة.. لكن أؤكد لكم ان أخر ما يفهم فيه القوس هو التجارة..
تخيل بقثه ان حتى الصفات نفسها تجدها متناقضة..!!
يعني ازاي صاحب فلسفة وسطحي…!!!!!!!
ازاي متفائل لدرجة عمياء وقلق..؟؟!!!!!!!!!! قلق من إيه..؟!! ح يعمل زي اللي ركبت عربية الستات وعربية الرجالة كللللها من عيلتها…!!!!؟؟
بص م الآخر كده.. حط البرج ف الدرج…!!
وإذا عندك كتاب عن الأبراج فاعتبر كأن عندك كتاب في افيزياء النووية بالضبط
الاتنين مش ح تعمل بيهم حاجة..!!

هؤلاء الرجال أسهموا في تطور البشرية..!!

مخترع اليد الداخلية للباب المنزلق لميكروباص التويوتا:
وستكتشف هذا عندما تحاول إغلاق الباب أثناء اطلاق الميكروباص بأي وسيلة أخرى غير تلك اليد…!
مخترع الفانلة:
لإتاحته الفرصة لعظيمة لنا بأن نطلق على أي شخص خنيق لقب “فانلة”..!!
شامبليون مكتشف حجر رشيد:
لولاك يا عزيزي ما وجدت أفتر إيت ولا التكعيبة ولا سيد الحرامي..!
التكعيبة:
حيث حولت معظم روادها إلى كتاب رواية و وقصة قصيرة (جرب أن ترمي ودنك مع رواد المكان وستكتشف السبب…!)
مخترع سوستة البنطلون:
ستتذكره حتما كلما عدت إلى المنزل واكتشفت إنك لم تغلق السوستة منذ خروجك من المنزل..!!
مخترع البنطلون نفسه:
لولاك يا عزيزي لما كان مشروع قومي مثل شارع جامعة الدول العربية قد أنشئ..!

الأيام "الأخيرة" لطالب عجوز…!

كان من المفروض أن أكتب لكم اليوم عن لقائي المفتوح اﻷول خارج المكتب مع الشاعر عبد الرحمن يوسف..، أو التطورات الجديدة عند المغامير، أو أحداث الاحتفال الجميل بتنصيب “جنو لينوكس” الذي تعرفت فيه عالما جديدا ووسطا جديدا.. لكن زيارة مفاجئة إلى الجامعة غيرت كل ذلك..
بالمناسبة هذا الموضوع شبيه بالمواضيع المسلسلة اللي كنت باصدع بها الرؤوس البريئة لأعضاء منتديات عبد الرحمن يوسف.. وبما إني اصبحت الآن مدونا وغير راغب في تصديع رأس حد انشره هنا في مدونتي التي لا يدخلها من الأساس إلا راغب في تصديع رأسه..

البداية.. يوم عادي جدا..
صحيح أن ليلته قد شهدت بعض اﻷشياء غير العادية التي كان منها حذف الويندوز تماما ونهائيا من على جهازي وتوديع الـNTFS إلى الأبد استقبالا لـext3 ولينوكس ubuntu..ثم استيقظت صباحا وقد طلع في دماغي ان اقوم بتركيب KDE للنظام لأني أعشقه من أيام اللينوكس ماندريك.. وحيث أن حجمه ٦٠٠ ميجا تقريبا فقد تركته ينزل وذهبت إلى الجامعة في مشوار “ظننته خاطفا..!!”إلى الجامعة كان الغرض منه معرفة موعد امتحان الدور الثاني ودفع المصاريف…
لحد عنا ومفيش مشكلة..

ﻷ فيه..!
نزلت الجامعة.. دخلت لأول مرة دون مشاكل ودون جرّي كالعادة إلى مكتب الأمن.. غالبا ﻷننا ف أيام تنسيق..!
فين يا عم المصاريف..؟ كانت الخزينة مزدحمة لدرجة تشعرك ان الطلبة بيقبضوا فلوس مش بيدفعوها…!
اخرجت إذن الدفع الذي اضطررت اضطرارا لعمله أيام النتيجة بسبب موضوع مكتب الأمن اللي لسه قايله ده..
مفيش فايدة برضه زحمة.. صحيح منظر البنات الجداد -اللي همه تقريبا مواليد ٩٠..!- كان يفتح النفس في أغلب تجلياته، إلا اني وجدت ان دفع المصاريف هي فكرة يمكن تأجيلها شوية..
جدول الدور التاني لرابعة عربي فين..؟
في مكان الجداول..
ومكان الجداول لمن لا يعرفه هو بجوار باب آداب المجاور للبوابة الرئيسية للجامعة.. وهناك وجدته..
كنت متوقع مثلا ألاقي جدول دور اكتوبر.. وللا جدول دور نوفمبر..
جدول دور سبتمبر..؟؟!!!
يا نهار ازرق.. أول مادة إمتى..
١٠ سبتمبر…!؟؟!!!!!؟؟
رائع.. وهكذا صار امتحاني -فجأة- بعد اسبوع من الآن..

الصدمة والرعب والــمــطــوحــة…!
بالطبع من سكات كده ومن قصيره كما يقولون توجهت إلى مكان جداول المحاضرات لأعرف ما هي مواعيد محاضرات المادة التي سأرسب فيها -المادة الأخرى التي سأرسب فيها في التيرم الثاني وليس الآن..!- فوجدت حائطا خاليا من الجدول ومملوءا بواحدة فرّاشة تخبرني بأن الجدول “أول السنة”..
رجعنا للمصاريف تاني..
ما ينفعش..!
هو إيه اللي ما ينفعش..؟
إذن الدفع ده.. روح شؤون الطلبة وهات واحد زي دول.. ثم أشارت إلى أذون الدفع الأخرى..
جولة شديدة السخافة بين شبكاين يخبرني كل منهما أن قسم العربي في الشباك الآخر(!!) حتى أخبرني رجل مألوف الشكل يقف أمام أحدهما أن الموظفة مش موجودة وأن فيه واحد تاني هو الذي يقوم بشغل قسم عربي..
ما فيش شغل لعربي تاني.. أنا زهقت..!! استنى الموظفة لما ترجع…
كان هذا هو القرار الذي اتخذه القائم بأعمال موظفة العربي في نفس اللحظة التي قدمت له بطاقتي فيها…!
فقررت أن أدخل الشؤون من بابها الرئيسي وليكن ما يكون…

نافوخنا ضرب…!!
ببراءة سألت الفراش اللي على الباب (وأنا لا أعرف لماذا أنتظر أن يكون الكلام اللي ح يقوله خارج سياق الهبل الذي يحدث من أول اليوم..!) : قسم العربي لو سمحت..
الموظفة فوق في التنسيق وجاية كمان خمس دقايق..
تكرر السؤال والإجابة ٣ مرات كل خمس دقايق..!!
واضح أن الخمس دقائق هذه ثابتة لا تتحرك ولا تتأثر بمرور الزمن…
اشعلت سيجارة عندما وجدت الموضوع ح يطول.. فوجدت أخينا الفراش بسماجة:
مفيش حاجة كده..؟ (مشيرا إلى يدي الحاملة لعلبة السجاير..)
لما تيجي الموظفة المسئولة عن علبة السجاير…
سئمت – بجد- من هؤلاء الذين يعتبرون أن كل دورهم في الحياة هو أن تقدم أنت لهم شيئا ما..!!
قام الفراش لسبب ما من مكانه وبقيت الفراشة التي كانت جالسة بجواره ككومبارس صامت أحيانا ومزعج غالبا.. فسألتها:
موظفين قسم عربي فين يا حاجة…؟
عند النافورة…!!
هما مين دول اللي عند النافورة…؟!!
الموظفين..!
الموظفين عند النافورة..؟؟!!
أيوه يا بني..
بيعملوا إيه عند النافورة…؟!
بيشتغلوا..!!
واضح ان اخوانا الموظفين غالبا بيشتغلونا احنا.. وربما كانت تقصد مبنى الإدارة الذي عند النافورة.. أو تقصد أن تعطيني فسحة أتأمل فيها النافورة وأنسى الموضوع الأصلي الذي أتيت لأجله…
عموما ذهبت إلى هناك.. وأول ما وقعت عيني عليه في المبنى هو زجاج النوافذ..! تذكرته مهشما بفعل حجارة المتظاهرين من الشباب.. وتذكرته مهشما أيضا بفعل انفجار سيارة الضابط الذي دهم المتظاهرين بسيارته…
لا شيء على صفحة المبنى يوحي أن بداخله موظفين من قسم عربي “بيشتغلوا” او على وشك الخروج..
تجاهلت تماما بائع الكتب على رصيف المحطة وأنا في طريق الانصراف..
لا وقت للقراءة..!

نلتقي بعد الامتحان…

رأيت فيما يرى المدون…!

رأيت فيما يرى المدون إني فتحت المسنجر
عادي جدا ما كل الناس بيفتحوا المسنجر…
لأ ما انا فتحت المسنجر لقيت حد باعت لي رسالة OffLine..
فيها إيه..؟
ما انا كنت حمار زيك كده وسألت نفسي السؤال ده.. لقيت الرسالة كلها عبارة عن لينك.. ضغطت اللينك..وقفلت الرسالة..
ولقيت نفسي أمام مدونة اسمها الأرض بتتكلم عربي
وتحديدا أمام هذا البوست:

ذي سحالي – فؤاد حداد
أنا حرّه وأموت في الحريّه

ومزاجي أعمل سحلـيّـه

أزحف ع الأرض وع الحيطه

واطلع وانزل واعمل زيطه

واضرب في الشمس طرمبيطه

أنا حره بديلي وبراسي

وماحدّش يكتم أنفاسي

وما احطش ماسك لإحساسي

ولا احط قزازولا أقفل شيش

عقلي يا هزاز

كلّك نغاشيش

وأنا حره أعيش

أنا عاوزه أعيش

أنا بدي أعيش

أنا نفسي أعيش

على كيف كيفي

أنا حرّه وأموت في الحريّه

ومزاجي أعمل سحلـيّـه

أرقع في الشمس الزغروطه

واخد حمام من غير فوطه

أنا حره براسي وبديلي

حره بنهاري وبليلي

حره بمناخيري القطقوطه

أنا حره بخشمي ماهوش خشمك

وما احطش برقع ولا يشمك

ولا احط قزازولا أقفل شيش

عقلي يا هزازكلّك نغاشيش

وأنا حره أعيش

أنا حرّه وأموت في الحريّه

ومزاجي أعمل سحلـيّـه

أنا ابقى سحليه وسيمه

ويجيني برص بتاع سيما

وبتاع مزيكا وترا لم لم

واتاوي في حضنه وأنا باحلم

ويقول لي ابتسمي يا بسيمه

وافرحي بالميه وبالخضره

ماتحطيش احمر ولا بودره

ولا احط قزازولا أقفل شيش

عقلي يا هزازكلّك نغاشيش

وأنا حره أعيش

أنا حرّه وأموت في الحريّه

ومزاجي أعمل سحلـيّـه

سحليه وحبايبي سحالي

أنا حره بحالي ومحتالي

حرة أصحصح والا أسخسخ

والا أغني وقلبي يشخشخ

أبواب الدنيا فاتحه لي

ما اقعدشي في الأوده لوحدي

وما احطش إيدي على خدي

ولا احط قزازولا أقفل شيش

عقلي يا هزازكلّك نغاشيش

وأنا حره أعيش

أنا عاوزه أعيش

أنا بدي أعيش

أنا نفسي أعيش

على كيف كيفي

“فؤاد حداد – قصيدة “ذي سحالي

من ديوان “رقص ومغنى” ضمن ديوان “أشعار فؤاد حداد” (أو الدواوين الخمسة) – الناشر دار المستقبل العربي

هو ده البوست..؟

أه هو ده وعليه تعليق واحد

طب ومين اللي بعتهولك

ما انا برضه كنت حمار زيك كده وسألت نفسي السؤال ده بعد ما قفلت الويندو.. هو كان كاتب على نفسه في المسنجر”يااااا”..!

بس كده..؟

اه بس كده

طب وقفلت عليه ليه..؟

كنت بسمع “أكدب عليك” ومركز فيها

بتاعة وردة…؟

آه

طب طلع الصاجات يللا

اكدب عليك ان قلت بحبك لسه

اكدب عليك..!

المهيب الركن أحمد فيصل..!!

اختبارين في أحد المواقع..
.
.
.
وكانا يحملان هذين السؤالين:
.
.
.
.

الأول
.
.
.
.

أي الأفلام الكلاسيكية أنت..؟
.
.
.
.
.
والثاني
.
.
.
.
.

أي القادة المشهورين أنت..؟

فأنا طبعا أعجبني الثاني
.
.
.
.
.
.

فاخترته..
.
.
.
.

سألني بعض الأسئلة
.
.
.
.
.

أجبت عليها..
.
.
.
.
والمفروض أن يخبرني بعد ذلك
.
.
.
.
.

أي من القادة المشاهير أقرب إلى شخصيتي…؟
.
.
.
.
.
.

لقد كان هذا…
.
.
.
.
.

What Famous Leader Are You?
personality tests by similarminds.com
ما رأيكم…؟!

رسالة في فنون الـ"لووول"..!!

من كام سنة كده وفي شات مع ناس أجانب ما يتخيروش عنكوا لاحظت تكرار هذه الكلمة عدة مرات: LOOOOL (بأي عدد من حروف الـO) وعندما سألتهم عليها -ولم تكن قد وصلت عندنا على ما يبدو أو أن ثقافتي أنا اللي كانت قاصرة- قالوا لي انها تعادل “ضحكة” وفضلت مش فاهم.. يعني إيه الصعوبة مثلا في “هاهاها” أو حتى في “هههههههه”..؟ وما علاقة لووول -صوتيا على الأقل- بالضحك..؟
ربما تكون لوووول هذه اختراع أمريكي لأن هاهاها شكلها عندهم غبي جدا.. انظر مثلا:

Hi Jimmy..
hi Joe..
I heard that Mary Kicked you out yesterday..!
No Joe.. But I just loved the cool breeze at her doorway..!
Ha Ha Ha..!!!

تأمل بقه مدى رخامة منظر آخر سطر بهاهاها هذه..! لكن مع ذلك فأن هذا لا يفسر شيئا عن مصدر “لووول”..
ويبقى السؤال معلقا: من أين أتت لووول..؟ وحتى تظهر إجابة هذا السؤال فإني لن أتخلى عن هاهاها التي أحببتها طوال حياتي وهههههه التي بدأت في التعود عليها..!