إنتوا فاكرينها صحافة بجد..؟!

ليست ص�افة

ليست صحافة

عندي سؤال لو يسمح الأخ الصحفي أو لا يسمح فأنا سأسأله على كل حال: يعني إيه صحافة مدونات..؟

يعني صغحة أو تلت صفحة -ركن- عن المدونات والقضايا الساخنة المثارة عليها والحاجات التي تهم الناس أو على الأقل التي تراها أنت أنها كذلك..

جميل..

طب يا أخ يا صحفي.. هل هذه صحافة..؟

هي العملية ديّتها إيه..؟ أقول لك انا..

تفتح الكمبيوتر وتخلي السكرتيرة وللا حد من بتوع الجمع يعمل لك سيرش على الموضوع “كذا” ويعمل لك print out من اللينكات اللي فيها wordpress أو blogspot وبالمرة blogspirit عشان بالمرة نجيب معانا وائل عباس وقضيت على كده..! no mess- no fuzz  وصفحتك في ايدك وفلوسك في الإيد التانية ورئيس الصفحة يقول لك قشطة..

بس يعني اذا ما كانش فيها رزالة.. دي صحافة..؟

تدور على موقع بيدي دعاوي لجايكو وتشترك فيه وتضيف المدونين اللي هناك عن طريق وائل عباس برضه أو هاني جورج أو مالك أو حد من اللي ضايفين ناس كتير قوي دول.. وتك تك تك التدوينة تكون عندك لحظة ما تنزل وأول ما تتكلف بالموضوع “كذا” تقوم جري فاتح الجايكو وللا الجووجل ريدر وتشوف الناس كاتبة ايه.. ميزة المدون انه غالبا بيكتب عن الحدث في ساعتها ودي حاجة أكيد ح تستكيف منها جدا يا أخ يا صحفي وح تفكرك بأيام ما كان الصحفي هو اللي بيعمل الكلام ده من نفسه وبعدين ح تنسى اللي افتكرته ده وبرضه صفحتك ح تبقى في إيدك وفلوسك في ايدك التانية ومدير التحرير يقول لك قشطتين…

بس يعني اذا ما كانش ح يضايق حضرتك.. دي صحافة..؟!

وطبعا لأن سيادتك صحفي قد الدنيا ومعاك شهادة عالية -مش بكالوريوس بصمجية بتقدير مدفع سريع البصمات- فلازم وانت بتعمل الكوبي وبست يبقى ليك نظرة مبعدية في الكوبي وبيست، يعني لما كالعادة تتكلف بموضوع “كذا” وتلاقي المدون مش مراعي المعايير الصحفية وهو بيكتب التدوينة -أصله يا حرام مكانش عامل حسابه ان سيادتك ح تسرقها- فمفيش أي مشاكل.. طلع المقص وادعي لبيل جيتس اللي زي ما عمل لنا Copy و Paste عمل لنا Cut كمان (*).. ومشيها لا تقربوا الصلاة طالما كونهم سكارى أو لأ مش موضوعك، وللا مثنى وثلاث ورباع ومش مشكلة برضه يعدلوا أم لا يعدلوا براحتهم، ولتكن الاشتراكية ان الناس تشتغل عند الحكومة والحكومة هي اللي تلم المكسب وطبق لحد هنا بس… اما بقه اذا كنت بتشتغل بروحين يعني صحفي وناشط سياسي فلا مانع أبدا أنك تجيب المدونات التي ينتمي اصحابها لأيديولوجيات مختلفة وامسح بيهم الأرض على كيفك واتريق عليهم وعلى افكارهم لما تشبع..! (**) وبرررررررررررضه ح تبقى صفحتك في…. إيدك وفلوسك في إيدك التانية ورئيس التحرير بيقول لك قشطات..!!

بس يعني اذا ما كانش فيها ازعاج لسيادتك.. دي صحافة..؟!

هو انا ما اعرفش إيه موقفك.. لكن أنا مدون يرفض صحافة المدونات.. وصحفي يرفض صحافة المدونات..

ليه..؟ أنا كمدون بكتب للناس وما بطلبش منهم فلوس.. وانت كصحفي بتاخد كتابتي دي وبتقبض عليها فلوس انت ما تعبتش فيها.

أنا كصحفي أرى صحافة المدونات إهانة لإبداعي ولقدراتي الصحفية.. لأني بدل ما انزل اجيب خبر أو اعمل حوار مع مصدر أو اكتب فيتشر أو كتوبة… إلخ بعتمد على مجهود غيري.. باتطفل من الآخر وما بتعلمش حاجة.

الصحفي بياخد تدوينتي من غير ما يستأذن، واذا استأذن بيقول لي انا ح انزل التدوينة دي في جريدة كذا عدد يوم كذا -مش استئذان قد ما هو اعلام بأمر واقع- واذا أعلمني واستأذني فهو غالبا يعمل مقص التعديل والحذف والانتقاء في التدوينة بشكل قد يفرغها من مضمونها.. وإذا لم يفرغها فسيكتفي غالبا باسم مدونتي دون ذكر اسمي انا أو رابط المدونة مما يعرض الباحث للالتباس بين مدونات وربما منتديات تحمل نفس الاسم فهو يهدر حقي في نسبة انتاجي إلي..! واذا تجنب كل هذا فهو لا يزال بيقبض فلوس على شغل انا عامله عشان يكون مجاني..!!

لهذا انا الصحفي وأنا المدون نتفق على رفض صحافة المدونات.. وسأرفض كصحفي أن أشارك في هذه المهزلة وسأقاطع كمدون كل الصحف التي تتاجر بمدونتي إلى أن ترد لي حقي وتتوقف عن هذه الممارسات.

وسأضع هذا الشعار تعبيرا عن موقفي.

stealpress1

__________________________

* نفذت جريدة الشروق الماشية ع الموضة تلك الفكرة بالفعل في العديد من التدوينات التي سـرقـتـها فأعمل الأخ الصحفي الأزميل والمنشار والفارة في التدوينات دون اهتمام ومنها تدوينة بنت القمر عن آسر ياسر مما تسبب في تصاعد ثورة المدونين التي نجمت عنها هذه الحملة وشقيقاتها..

** أما جريدة البديل فقد نفذت الفكرة عن طريق احد محرريها من ذوي الاحتياجات الماركسية الذي دأب على مهاجمة المدونات القومية بشكل خاص منها هذه التدوينة للصديق شادي العروبة (سيوصلك اللينك للكلام المنشور مباشرة.. على الله الناس اللي كانت بتسألني بتكره البديل ليه تكون فهمت دلوقت..!!)

Advertisements

8 thoughts on “إنتوا فاكرينها صحافة بجد..؟!

  1. تدوينة ممتازة يااحمد

    بس تصحيح معلش

    السرقة والتشوية من جانب جريدة الشروق تم من العدد الاول لهم ولم تقم الثورة بسبب تدوينة بنت القمر التي اشرت لها لانها كانت قائمة من قبل ذلك بفترة كبيرة وكانت هناك مراسلات على الاقل بيني وبين المسؤول عن الصفحة وعدد آخر من المدونين المتضريين كتب عن هذا الأمر

    تابع هذه التدوينة عندي لتعرف بداية الموضوع والتي كتبت عنها بتاريخ 3 فبراير

    http://afkaar-bella.blogspot.com/2009/02/blog-post_03.html

    وستجد لينكات في موضوعي تشير لتدوينات اخرين كتبوا عن مشكلتهم مع الشروق

    وكذلك تابع عند مختار العزيزي

    http://unbrainwasher.blogspirit.com/archive/2009/02/14/traditional-media-and-bloggers.html

    فياريت تصحح المعلومة التي كتبتها

    تحياتي

  2. يا عمنا جريدة الشروق دى الناس الادارة اللى فيها قاعدين على بنك فلوس و لا عزاء للصحف الفقيرة

    المصرى اليوم زيها برده

    صحافة الملايين

  3. @bella:
    يا عزيزتي أنا متابع من أول يوم.. ولو تفتكري أنا سألت على الجايكو لما ذكر موضوع تدوينتك في العدد الأول اني مش لاقي ركن المدونات ولما لقيته كتبت “هوامش على عدد الشروق” بس كل المسألة من وجهة نظري ان الأحداث فضلت تتصاعد تتصاعد لحد ما وصلت لنقطة انفجار.. يعني فيه ناس – وانا منهم- فضلت تعد على الشروق للعشرة كما يقول العرب لحد ما الموقف تجاوز مرحلة السكوت.. أعتقد ان وضع “تصاعد” قبل “ثورة” ح يصلح الأمر..
    تحياتي

  4. تعقيب: أقر أنا اللي عايز اسرقك..! « Faisslogia..!

  5. معلش يااحمد
    الموضوع متصاعد من قبل التدوينة التي ذكرتها وكما قلت لك من قبل ولكن لابأس اذا كنت مصراً على رايك

    لكن طالما أنك ترصد الموقف فيجب توضيح الامور كما حدثت بالفعل وبترتيب حدوثها وليس بنهاياتها فقط

    وشكرا

  6. سلام عليكم
    ازيك يا احمد موضوع صحافة المدونات ده بقا كبير جدا
    اسمحلي اعرفك بنفسي الاول
    صحفية في العالم اليوم ومسئولة صفحة المدونخانة اللى بتصدر كل خميس مع ملحق تيلي بيزنس
    يعني انا جيت اوضح فكرة صحافة المدونات اللى اكلمت عنها انت ف الاول بتقول انتو فاكرينها صحافة بجد
    اسمح لي ارد واجاوب
    انا عن نفسي شايفاها صحافة بجد
    وده من خلال شغلي
    شوف يا احمد انا لسه متخرجة من اعلام2008 واعتقد اني درست الاعلام كويس للحد اللى يخليني اقولك ان شغل الصفحة عندي صحافة فعلا انت لو كنت رفضت موضوع الشروق كنت قلت يمكن لان المساحة عندهم صغيرة مثلا او اتفق معاك ف جزئية القص واللزق
    لكن انت يا احمد رفضت مبدا صحافة المدونات خالص
    عندي ف المدونخانة بنعمل حوارات مع مدونين وبنعمل زي تحقيق صغير واراء المدونين فيه بنعمل تقرير مثلا عن المدونات بس مع الاهتمام بكتابه تعريف للمدون ولينك المدونة وكمان ايه اللي كاتبه المدون عن نفسه في البروفايل ووصف المدونة يعني بنعمل زي مقدمة كده للتعريف بالمدونة
    طبعا معاك ف جزئية ان المدون يعرف
    ويمكن انا كنت بعمل كده بعد ما ادخل المدونة لكن من ساعه ما حسيت بالضيق من خلال حملتكم ضد الشروق قلت اني هبدا اتكلم مع المدون وان كان انه لحد النهارده بقه فيه علاقة جيدة مع اللى كتبت عنهم ف الصفحة
    انا شغلي اسبوعي وبجد مش بيخلص ف اعده زي ما بتقول
    لا والله ده مجهود كبير وساعات بخرج ويبقي الحوار حي
    اما بقا ان الريس يقولك قشطات والله ولا مرة اتقالي لا قشطات ولا مربات
    ولحد النهارده مفيش فلوس لاني بعتبر متدربة لسه مع اني خلصت 3 شهور تدريب معاهم
    يعني يا احمد معلش ع التطويل
    انا حكيت لك الحكاية وياريت انك تشوف مدونة”المدونخانة” او جروب الفيس بوك”المدونخانة” وتشوف الصفحة وتقولي رايك
    ولو حبيت انك تيجي معانا ف برنامج اي تي شو يوم الخميس القادم باذن الله ونتناقش عن موضوع النقل من المدونات يا ريت تبعتلي ع الايميل ده
    modawen5ana@yahoo.com

    هنتكلم عن رفضك للنقل وكمان عن التصميم اللى عملته بشكل مميز شوف كده ورد عليا
    سلام

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s