دوم دوم دومدوم.. كورة..!!

الوطن الكورة

تحديث 1: 28 يناير، 2010 الساعة 9:48 م
بعد التدوينة

لأ وخلي بالك، مفيش مناسبة أهم من تشخيع مصر، مفيش أيييييييييييي مناسبة أهم من تشجيع مصر، المسيحيين في نجع حمادي يتقتلوا يولعوا عاااااادي لأن مفيش مناسبة أهم من تشجيع مصر، سينا تغرق تندعق مش موضوعنا لأن مفيش -يا بهايم يا قلالاة الوطنية- مناسبة أهم من -دوم دوم دومدوم، مصر- تشجيع مصر، افخم مطار في مصر سقفه يقع من كوبايتين ميه مش مهم، لأن مفيش مناسبة أهم من تشجيع مصر، أظن ح تقول لي غزة والحدود والإسرائيليين اللي بيتمسكوا بجرايم ويرجعوا بلدهم في الكتم وفي المقابل نلفق تهم لحزب الله وحماس، ح افضل اعلم فيك لإمتى..؟ مفيش مناسبة -دوم دوم دومدوم مصر- أهم من تشجيع مصر.. ولا عمرو أديب اللي مرمط بكرامة كل مصري الأرض في حوار خالد مشعل..؟ كمان بتكره عمرو أديب..؟ غريبة مع أنه بيقول مفيش مناسبة أهم من -دوم دوم دومدوم مصر- تشجيع مصر…

ولا انت فاهم حاجة، انت مش وطني على فكرة، فين فانلة المنتخب..؟ فين العلم..؟ الرسم على وشك مش واضح ليه..؟ كنت فين ساعة ماتش الكاميرون..؟ تلاقيك كنت بتشوف الجزيرة ولا أي قناة تانية بيتها من قزاز و-ياي- بتقول اللي بيحصل وما بتقفلش ع النشال لحد ما يخلص مع الزبون زي ما بنعمل مع إسرائيل في غزة، ما انت مش مقدر -هاقول لك إيه يعني- ان مفيش -دوم دوم- مناسبة -دومدوم- أهم من تشجيع -مصر-..!!

آه، ما هي الوطنية كورة، والموت في سبيل الكورة، ويقال فعلت هذا لله وللكورة أي ببلاش، وتحية الصباح لعلم اتحاد الكورة، وحب الكورة فرض عليا أفديه بروحي وعينيا، ورسمنا على القلب وجه الكرة، لعيبة واستادا وكورنر جميلا، ويعني إيه كلمة كرة يعني كاف وراء وهاء.. هاااااء.. هااااااء، أعوذ بالله من الشيطان الرجيم…
ده انا على كده استشهادي بقه، الطمي يا انشراح بس بالراحة عشان خدود الشباب السيس ما بتستحملش..

تحديث ١:
صاحبي الجميل محمد علي تفاعلا مع التدوينة دي كتب تدوينة برضه لكن بما أنه كاتب منتديات وليس مدون فقد كتبها هــنـــا
ربنا يخليك ليا يا جميل 🙂

Advertisements

2 thoughts on “دوم دوم دومدوم.. كورة..!!

  1. يبدو أنك دسيسة على هذا الشعب العظيم الذي يلتف حول هذا المشروع القومي العظيم الذي يهدف إلى “تنمية” كرة القدم المصرية، و”تصدير” الفرحة للشعب العربي الجالس أمام الجزيرة الرياضية، و”زرع” البسمة على شفاه المصريين، و”صناعة” السعادة في الشارع المصري والشارع لعربي (أو الكام بيت اللي في الشارع العربي اللي لسه ما حقدوش على مصر العظمى)… ليه كده؟ انت مش بتتمنى الخير للبلد ليه؟ مين اللي زقك علينا تنكد علينا مناسبة زي دي… مين؟ حماس ولا قطر؟ ولا يمكن ألأنبا كيرلس؟؟ هه؟

  2. ده فيما يخص الصناعات، لسه الفنون بقه، عندك “نقش” اسمنا في تاريخ البطولات، “ورسم” البهجة على الوجوه، و”طبع” قلوبنا بختم السعادة، و”عزف” سيمفونية من اللعب الجميل..
    بس حضرتك أنا مزقوق من الجناح العسكري لتنظيم فيران السبتية، احنا اللي فصلنا النت عن مصر، واحنا اللي قتلنا العسكري ولبسناها ف حماس واحنا اللي رايحين بنجيلا نخربها بإذن الله 😀

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s