اليوم الموعود :)


ال..أول

الفقير أتشرف بدعوتكم لحضور الحفل الختامى لمهرجان النشر الجماعى الاول

الحفل يوم الجمعة الموافق 19 فبراير 2010
نرحب بحضوركم من الساعة الخامسة
بالحديقة الملحقة بمركز محمود مختار الثقافى

* سيعرض فيلم قصير عن نشر جماعى اخراج شيرين طلعت

* و سيتم تكريم لجان التحكيم التى شرفتنا فى الموسم الاول

القصة:
أ/ هويدا صالح – أ/ اسامة فرج – أ/ أحمد سعيد .
الشعر:
أ/ بهاء جاهين – أ/ سالم الشهباني – أ / د. . محمد ابراهيم طه -أ / عبد الحسيب الخناني .

* و تكريم الفائزين بالنشر فى مجال القصة و الشعر

* و يختتم الحفل بعرض لفرقة المولوية المصرية بقيادة ا/ عامر التونى

على جنب:

سبب الدعوة اني احتمال ابقى احد الفائزين وأن يكون لي قصة في كتاب القصص “دون حذاء افضل”

عاجبني جدا الاسم، تقريبا بوش ح يخطب في الحفل 😀

على جنب 2:
اللي طالبة معاهم قوي استقبال البرادعي، الحفلة من 4 إلى 10، يعني يوووم مفتوووح، معاكوا طول النهار، مش ح تفلتوا يعني، إلا لو كان الأمن له رأي تاني طبعا 😛

حدث في نقابة الرؤساء…!


على جنب: كتبت هذا النص منذ سنوات أربع.. أعتبره تجربة عبيطة وبدائية، لكنني أحببتها جدا…

شوهد هذا الإعلان معلقا فوق أحد الحوائط:

Job Opportunity

مطلوب فورا وبأجر مجزي
تعلن دولة روبابيكيا عن حاجتها إلى كادر متميز لشغل الوظيفة التالية:

رئيس جمهورية

على أن تتوافر في المتقدم الشروط التالية:

1- أن يبلغ من العمر 70 (سبعين) سنة ميلادية على الأقل.
2- أن يكون حاصلا على رتبة عسكرية لا تقل عن لواء.
3- خبرة 20 سنة على الأقل في نفس الوظيفة.
4- أن يكون رئيسا لحزب (المستقلون يمتنعون)
وتقدم الطلبات بواسطة وكيل المتقدم في خلال 12 ساعة من الآن….

نظر الجميع مذهولين إلى ذلك الوجه المألوف الذي اقتحم عليهم منى النقابة غاضبا ملوحا بورقة…
– قريتوا الهبل اللى مكتوب ف الورقة دي…؟!
– مالك يا رئيس 1..؟!
– إقروا.. إقروا بنفسكم..!!
تناول رئيس 2 الورقة فألقى على أسماع الحضور ما قرأناه على الحائط منذ لحظات… استمر في القراءة

يوليو…. للشاعرة سيدة الشولي


على جنب: اعتذر لصاحبة تلك الكلمات الجميلة على عدم استئذانها بنقلها في مدونتي للاسباب التي يعرفها اعضاء المنتدى… لكن الكلمة الحلوة كالطيب الذي لا يملك إلا أن ينتشر…

أحمد فيصل

يوليو..!

بمبادئ ستة حِلِمْنَا

وِيَـــــــــــــاه ..

عَ الحلم الحلو اللي

رسمناه ..

ومشينا طريق العِزَة

مَدَاه …

تعليم مجاني

وحققناه ..

إقطاع وف وقتُه خلاص

لاغيناه ..

غنينا لناصر

شجعناه ..

الراجل قال وإحنا

بايعناه …

إحساسُه الصادِق

صدَقْناه ..

صدقنا فْ يوليو الحلم

معاه

بس ده معناه

إننا دِلوقت خلاص خُوناه؟

لَمَنْ سيبناهم

حرقوا الصورة الوطنية ؟!

وقفلنا وِدَانا على استحياء

وصراخ مصانعنا مِدَوِيَّة ؟!

باعوا كُلُه مزاد

وما زاد

في جيوب الحرامية !!

على عين التاجر والتُجار

قَصَفُم

بُستان لشترا كية !!!

يا وطن مدبوح

تنفُض في الروح

مِن كُتر جروح المِطاطية

إيه باقي

يا حلم زمان فينا؟!

إحنا اللي شبعنا وكفينا

من وجع البطن وسَفِينا

أحلام ساذجة

على وهم طريق الحرية

مين فينا الصح؟

إحنا وهوه؟

والا اللي مزاجهُم عال العال

وعَمَلُمْ راسمال

مِ الرجعية ؟!

والا عادشى قضاء والا إقامة

من فِعل ولاد المؤذيه !

إقطاع موجود

جبروت موجود

لا ثمر بيجود ولا حلم بيوم الصباحية

أهو حلم زمان

ويا ريتـُه ما كان

سَرسِب في أيدين الحراميه

بايت في هوان

وقميص عثمان

عدل بتنجان

لا لُه دخل بدين

ولا سبحة ومَسْـكْ مِصَلِيَّه

ولا عاد شي وجود للقومية

ثورة … ما ثوراش

شِلاه يَا زمَان العِبودية !

الله يرحم

قلبُه الطيب

ظنُه أهو خَيِّب

صاحب أحلامنا الوردية

ـــــــــــــــ

23 – يوليو – 2008
الشاعرة/ سيدة الشولي

فـُـلـّـة كمان..!!


واحد
تاني
مسافر
برضه
واخد حلمين
على قد الشنطة ما ساعت
وبقية أحلامه
سايبها
ف درج دولابه
ف بلكونة السطح
عند البقال اللي قصاده
عند جيرانه
ف حضن حبيبته..!
***

واحد
تاني
فـُـلـّـة كمان
عقد الفل اللي بيتفرفط قبل ما ينشف
فكرني بيوم لضمتنا وانا ف الجامعة
فكرني برباعية لعم جاهين متقالة غلط..
جيت اصلحها
باظت أكتر..!
جيت اقول غيرها
نسيتها
قلت اقول شعر من اللي انا كاتبه
وطلع بايظ برضه..!!
***

واحد
أول
قبل التاني
سافر
رايح نفس السما
طاير
سايب نفس الأرض
قلت له
قلت لهم:
طب ينفع حد يعيش طاير…؟!
وما حدش رد..!!
***

فكر تاني
مش كل احلامي ف بلكونتي
عند البقال اللي… إلخ إلخ..!!
فيه احلام تانية
مع اصحابي
على قهوة سهرت عليها جنب النيل
على عربيات الأمن اللي منتورة ف الشارع
وعلى.. ومع.. و.. و.. و..يا نهار أبيض..!!
ح الحق الم ف كام اسبوع اللي انا نتورته ف عمر..!!!!؟
***
مين فيهم فكر قبله..؟؟
أول
تاني
تالت
واحد سافر فعلا
واحد ح يسافر
واحد بيشاور عقله
مش فارقة
لكن فكر
انا مش حاخد شنطة
ولا أحلام
شيلها امانة ف درج دولابك
وف بلكونتك
مع احلامك
لكن اوعى تسافر
تتفرفط
قبل ما تنشف
زيي
وزيه
وزي بقية الناس الجاية ورانا
وتسيب عقد الفل…!!!

أحمد فيصل
5 يوليو 2008

عشق جوايا


برغم ان انتي ما حصلتيش..
حصلتي لي..!
برغم انك مع الأيام
– وبعد الذكرى عن حلمي
وبعد الحلم عن أيامي في الوحدة –
صبحتي مفيش
رجعتي لي..!
كأني عشقتك امبارح
بنفس طباعك اياها
ما تسمعينيش
لكنك تسمعي ليا..!
ما بتشوفينيش
لكن بتشوفي جوايا
يعدي المعنى ما الحقهوش بأفكاري
لكنك تأمريه يرجع
لأنك عارفة توهاني
وعارفة ضعف تركيزي
وجايز لما جيتي تضيعي فكرتي: ح ينساني..!!
وبعد ما ضعتي قلت أحب من تاني
سألت سوابق العشاق
قالوا لي استطعم الذكرى..!
ودقت.. لحد لما عرفت.
عرفت.. لزمت ذكراكي
كأني كنت بس باحب..
عشان من تاني اعيش حبك..
واقول انا كنت يوم ليكي
وكنتي لي…!!
برغم ان انتي ما حصلتيش
حصلتي لي..!
برغم ان انتي ما رجعتيش
لكن أول ما واحد صاحبي سمعني قصيدة حب
لقيت روحك بتنزل تسري في جسمي
بتتحدي بأعصابي وأهدابي وبرايا ومكنوني..
وكنتي..
وكنت..
وكنا بنرتعش م الوجد
كنا… بنبكي بعيوني…!!!!

أحمد فيصل
17 يونيو 2008